بسم الله الرحمن الرحيم
احد اهم الاسباب عشان تعيش صح
اقصد ⇣
انك تدبر امورك -بعد عون الله- وتسمتع في حياتك وتنجز اعمالك
هو" بفعل العلاقات الناجحه"
اذكر نقاط حولها *واُذّكر بكونها اجتهاد شخصي☘
،
بالعلاقات السليمة انت :
1-تقدر تستفيد من قدرات\وامكانيات الاخرين:
انت كذا تعيش بالطبيعه الي اوجدها الله ان الناس للناس
كلن يفيد الآخر ويكمله
من قال ان استفادتك من فلان يعني استغلال ولا ادري وش هالمفهوم المضيّع من وين جا
لان معانته اني اعيش معتمد على نفسي في كل شي كني كامل مكمل
تخيل انك تقوم بكل شي في حياتك
اكلك مو انت تطبخه وبس الا تروح تقطف الثمار ولا تذبح الشاة ياشنب
وتجهزه للطبخ ثم تقوم تطبخه وتاكله كله ياخي لاتستغل الثلاجات بليز
وملابسك اتك (اجلس) انت وسناراتك وخط فيها ولاتتوقع انك بتخلصها
مثل عجز افلام كرتون في دقيقتين يطلع لك اللبس جاهز توك ماوصلت لهالخبره يبيلك عمر
ثم عاد البسه واهتم بنظافته اقولك بعد طريقة الغسل وساعات صناعتك للصابون ؟
هنا عايشين في عالم الكل فيه يستفيد من الآخر بالطبيعه لمعرفتنا بنقصنا وحاجتنا
عشان كذا انت تعلم هذي النقطه واستخدمها صح
والاستغلال انك تكذب وتخدع وهذا مُحرم ومكروه على النفس
’’اذكر ايام الثانوي كان عندي صديقه علاقتنا مع بعض تمثل هذي النقطه وبقوه
انا وياها دوافير حريصين على الدرجه
لكن كل وحده لها قدراتها
فكانت هي دقيقه جددااا وحريصهه فصرت استفيد من هذا بدل لا اتعب نفسي
وفي النهايه القى نتيجه ماتوصل لنتيجتها
صرت اراجع معها واسألها عن المستجدات ولولا الله ثم هالحركه كان طارت درجات
وهي في المقابل كانت متوتره جدددااا لو تقول لها : ترااك، ماتت من الروعه
فصارت تجيني تتأكد معي من صحة الاجابه
واجمل مافيه هذا انها كانت صداقه بعد مو مجرد استفاده,,
فأنت احرص على الي بيفيدونك سواء في شخصياتهم
او بعلاقاتهم الوسيعه او ذكائهم او حرصهم او صلاحهم
2-تلقى الناس الي يناسبون مودك الحالي
هذي ماراح تفهمها اذا انت منحصر في ثلاث اربع اصدقاء
وماي فريند ات از ماي لايف ونظام مراهقه
لان اصدقائك بعد اوادم زيك قدرتهم محدوده
فانت لما تكوّن علاقات بتلقى الي يسعدونك لاتضايقت
او يرحونك لاشلت هم او يثقفونك وينوروك اذا احتجت
تتوقع كل ذا بيجتمع في كم شخص فقط طوال حياتك ؟
على كذا الله يعيننا وياهم :)
3-تعيش بتوازن لان العزله حتما بتقتلك والخوض مع الناس دائما بيضيّعك
اذا انعزلت صح بتلقى نفسك وبتكون بدرجه عاليه من صفاء الذهن والراحه النفسيه
بعيدا عن الضوضاء والاجهاد العصبي
لكن الشي لازاد عن حده انقلب ضده
بتصير كأنك في قرن مُختلف واحد غريب شاطح الاوادم ياخذون
وقت على بال مايفهمون عليك بطريقه تخليهم ينفرون ويتعبون منك
وانت في المقابل بتشعر بضيقه وَ وحده تخليك بالفرد طاااااخ,
وانتهت حياتك بيدك. . :)
لاتنكر ولاتكذب
انت تحتاج الناس اقلها الاختلاط بهم وهذا بيقودنا لثلاث نقاط اولها الاتزان والباقي في النقطتين التاليات :
4-تعرف العالم اي الاحداث الي تصير، احتياجات المجتمع وطبيعته
تحس انك مع العالم وبينهم ولما تعرف هالنقاط بتقدر تعمل مثلا مشروع ناجح او كتاب مؤثر
او حتى تعرف تمزح وتذب ومتى ووين وعلى ايش, وبتعرف كل شخص وايش يناسبه
ومواطن قوة المجتمع او الفرد ومواطن ضعفه بالتالي لما تخطو خطوه تصير الرؤيه واضحه عنك
مو درعمه ونجاح مشروع فاشل :)
5- تنفع و تنتفع بشكل اكبر
للي يقول " الي يبي معلوماتي يدروني "
استغرب من سببين قدرت اجدهم وراء هالفكره غير الجهل، والباقي في علم الغيب
•الاول :من شوفة نفس (غرور وتكبر)
•والثاني ضعف تقدير الذات
وانا اسألهم اثنينهم :
ماعمرك لمت شخص داس(مخفي) معلوماته لانها اثرت ثأثير بالغ على حياتك ؟
عن نفسي انتنرفز مره مع الي يقصر في نشر الفايده
صح انا بجتهد في البحث عنها لكن في المقابل
او مو وقت تقدير ذاتك هو عالي ولا واطي انا ابي المعلومه قولها
خل استفيد وتفاهم انت مع تقديرك
* او ايّن كان السبب *
عندك علم ومعرفه انشرها وابتغي وجه الله فيها
لما تعلن بقدر المستطاع, واحد اسباب الانتشار علاقاتك الواااسعه.
واذا انت تُأثر رفعة هالخشم على فايدة الناس فهذي مشكلتك ومحاسب عليها
او انت تستحقر نفسك وتظن مستحيل احد يستفيد منك
اجل وش سنع كل الي بتتعلمه بالله ؟
6- تتوسع مداركك
انت بها -العلاقات السليمه الواسعه- بتواجه حالات مختلفه وبتتعرف على مشاكل
وامور ماكنت متصورها
جرب تابع حساب قصص وشف وجهك وقتها كيف يتصفق ويتلون
على حسب القصه وخبرتك في الحياة
ايضا بتوسيع المدارك تقدر تعتنق المعتقدات وتتخذ نمط الحياة وتختار العادات الي تناسبك
لانك شفت وسمعت وقريت التجارب والتطبيقات وفوائد ومضار اكثر من كذا شي
ولعل اقواها تأثير تجي من الناس الي انت على علاقه بهم * أيّن كانت قوة هالعلاقه *
7-تكون اقوى
تقدر تعبر عن نفسك ,تصد المعارض, تناقش اراءك, تُعمل افكارك
سواءً لدينك او دنياك " المؤمن القوي خيرٌ وأحب إلى الله من المؤمن الضعيف "
"المؤمن الذي يخالط الناس ويصبر على اذاهم خير من من لا يخالط الناس ولا يصبر على اذاهم"
اما الي علاقاته محدوده او ياكافي منعزل
فبينصدم ويتأثر بادنى شي يخالف عُرفه وكأن العالم عباره عنه هو
،
هذا الي قدرت اجمعه عن موضوع العلاقات وتوسعه واهميته
ارجوا ان الفائدة وصلت، وجل من لاينسى ويخطى
دامت عافيتكم ❤
ليست هناك تعليقات:
إرسال تعليق