بسم الله
من انت ؟ وفيه بتعرف نفسك اكثر ولما تعرف نفسك بديهي بتعرف وش يناسبك من الامور مثل التخصص
وش انسب تخصص لك ؟ بناء على عدة نقاط تساعدك وتوجهك بإذن الله
اولا من الغباء انك بهذا العمر - ايّن كان عمرك يكفي ان هالشنبات خاطه - ماتعرف نفسك
لدرجه تكون اجهل الناس بها بدون عذر قوي جداّ!
هذا بيخليك تتخبط في الحياة او بالاصح * تنخض خض * ذا يلف بك يمين وذا يرجعك يسار وذا يرزح بك وذا ينفضك وهكذا
والمسأله جدا سهله مايبي لها د.طارق الحبيب ولا فيزياء ولاجيولوجيا
خاصه في هالعصر الي صارت فيه مقاييس، عليك تتكّي وتجاوب على اسئلتها، وهاك هذا انت
وقف قبل ترا والله لهم معايير توضح ان ذا صح وذا خنابيق مغير (يعني ليس صحيح)
1- المقياس عالمي معتمد
2- تاريخ المقياس من طريقة اكتشافه لتطبيقه
3- سلامة علم ومعرفة مبتكر المقياس
،
من المواقع المساعده لاكتشاف نفسك :
https://www.shabab12.com/know-yourself
ومن المقايسس :
- مايرز بريغز للأنواع (Myers-Briggs Types Indicator – MBTI)
← test MBTI jassm
← test MBTI
← 16personalities
يتميز هذا المقياس بكونه اكثر دقه اذ يصنف الشخصيات الى 16 شخصيه تحمل 4 احرف كل حرف له ضد
واجمل مافي هذا المقياس تقدر تكتشف شخصيات الناس بهالحروف فصاير ممتع ومساعد جدا
مثلا شخص لاحظت انه هادي كلامه متزن ويسمع اكثر مما يتكلم علطول هذا i
الحين عرفت حرف من حروف شخصيته الاربع باقي ثلاث
وهكذا تكتشف فيه لما تعرفه بالتالي بتعرف تتعامل معه باسرع وقت
- هيرمان HBDI
هذا المقياس اشمل
مصنف الشخصيات لاربع مجموعات
A موضوعي
B تنفيذي
C ابداعي
D مشاعري
ميزت هذا الشمول يوضح لك ابرز الصفات لكل فئه يعني بدل ماتتعمق في الشخصيه في تصنيف مايرز
وتعرفها بالتفصيل عشان تقدر تتفاهم معها اعرف انه من مثلا فئه A خلاص معناتها انه مايحب الكلام الكثير والبربره الواجده والتفاصيل التافهه الا في حالات معينه كذا اسرع واختصر عليك مايحتاج تدخل في اغوار شخصيته
وتدري وش انسب الكلام والي يأثر عليه
*والتصنيفات مايتعارضون مع بعض انما هنا مثلا هيرمان عام ومايرز خاص
فبتلاحظ كثير من شخصيات تصنييف مايرز تندرج تحت قسم من اقسام تصنيف هيرمان
*الي ابي تفهمه
ان الشخصيه لها مليون مسمى كل عالِم بيحط اسمائه "كيفي علمي " , انت لاتتوتر اذا تعددت مسميات شخصيتك
وتظن ان هذا غير، كلامهم صحيح الفرق ان هذا ممكن يكون اعم وهذا يهتم بجانب دون غيره وهكذا
*الي ابي تسويه
تعرف صفاتك اولا وهي المذكوره في التصنيفات وكررها عليك كذا شخص
ثم تقسمها لقمسين :
#نقاط قوتك
الي هي موجوده فيك بالطبييييعععههه مستواها جييييييد جددددا
#نقاط ضعفك
وهي المهارات والصفات الي مستواها مقبول عندك
مثال
شخصية INTP (المفكر او المعماري) في تصنيف مايرز وتندرج تحت الفئه A في تصنيف هيرمان
من نقاط قوته
مستقل (مهوب محتريك عشان يعيش )، ذكي
من نقاط ضعفه
قد لايفهم احتياجات من حوله بالتالي لايلبيها
،
وش الفايده ؟
نقاط قوتك هي نعمه الله خصك بها دون الكثير عشان تسحب عليها. . كف بالله :)
عشان تستثمرهااااا
تستفييد منهاااا
تقدرهها وتسعد بهاااا
اذا انت ماعرفت تستخدمها وتديرها فلوم نفسك، لا تندب حظك وتكفر بالنعمه !
’’ واحد راعي كلام ونقاشات يجلس مع هادين يكرّههم في عيشتهم ليش ؟ يعني ماعاد فيه ناس يتكلمون ويتناقشون زيك ؟
او مكان مناسب تحط فيه هالقدره كاليوتويب،السناب ؟ سبحان الله إلا شوفوني انا مسيجين(مسكين بالكويتي المبَربس) . . . . ،،
واما نقاط ضعفك
هذا اعرفها وحسنها لكن بشكل جيد لكن لايكون تركيزك الاعظم عليها لان نموها ابطى من نقاط القوه
طبيعي هذا موجوده عندك بشكل ضئيل وذيك بشكل كبير ايهم بيتحسن اسرع ؟
،
اوك كيف نغتنم هالخير الي عندنا ؟
بانك تضعه في المكان المناسب الي يعود لك بفائده، الذكي ذكاء منطقي عشان يساعده ذكائه ويستفيد منه
بيلعب بلايستيشن ولا بيحل واجب الرياضايت الي عليه خمس درجات ؟ > ياربييه ريحة المدرسه
مثال :
شخصين X . Y
X سريع في العدو بالطبيعه هذه نقطة قوته , قليل القراءه والثقافه هذا نقطة ضعف
Y قارئ بطبيعته يعني حط كتاب عنده وشف كيف يلهمه -بفتح الهاء- في ثواني > صيغة مبالغه عن كونه شغوف بالقراءه
، بطيئ في العدو هذي نقطة ضعف
التصرف الخاطئ :
ان ينظر X لاحسن ماعند Y فيتمنى ان يكون مثله
فيترك العدو والتدريب عليه ويعكف على الكتب طيلة السنه
والحال كذلك مع Y ينظر لـX فيقتدي به -فيما لايناسبه - ويترك القراءه ويركض يركض في الارجاء مفتتناً بالغزال الذي كان محروما من الخروج بداخله
النتييييييججججهه *الكارثه بالاصح *
X ثقافه متوسطه( تعادل ثقافة Y يوم كان ابو عشر سنين وهو الحين رجال ابو 19 سنه بيدخل الجامعه حركاتكم )
واللياقه تتراجع
،
Y *لنفسه*: وش هالزين وهالخفه والرشاقه يالله من فضلك * والمفاصل تشتكي *، يا X يلا نتسابق ان ادقك دق
X *بيتفلسف*: اولا لازم احماء عشان مانخرش العضلات
Y : تخرش العضلات ؟ وش هالمصطلح الحين سنه تقرأ مالقيت كلمة انسب
قل مااتشد ما توجعك ما تؤلمك , تقرا كتاب ولاتستفييد ليه ؟
X : اقول يلا بس نتسابق
واحد اثنين ثلاجه ,ههههههههههههه
Y : . . .
X : واحد اثنين ثلاثه
فاز اكس
ويناظر Y بطرف عينه نظرة استغراب , امانه وش كنت تسوي طول السنه مالت عليك ؟!
Y تفشل وحوّل على الكتب من جديد
( احسن راحت السنه وهو يتخضخض هالدب على غير سنع،انا قلت لكم انه دب ؟
تراه دب دب مره والحين مترهل , احسن2 هذا الي مايسمع كلام امه )
الاثنين حسوا بالوقت الي ضيعوه على تطوير مهاره ضعيفه لتكون متوسطه فقط
في حين يستطيعون تطوير مهاره جيدا جدا لتكون ممتازه ويصلون حد التميز بها
اذا التصرف الصحيح :
X ماشاء الله عليك يا Y خلاص من اليوم بحرص اقرأ 20 صفحه يوميا احسّن ثقافتي لكن طبعا تركيزي كلياتوه على هالطيبه ويضرب بكفه على البطه (البطه هي عضلة الساق)
،
Y والله ان X مثال على الصحه المثاليه وانا جالس كذا عاجبني اني افيض من الكنب من قو سمنتي !*ياقلبي*
من اليوم ورايح بحرص امشي يوميا نص ساعه وعقبال ما اتسابق مع X واتعلم منه اكثر واكثر , اي عشر كتب بقرأ الحين امممم
بعد عشرين سنه
X رياضي عالمي يحصد ميداليات ذهبيه في الاولمبيادات باستمتاع وحماس
وقدوه لملايين الرياضيين ويعطي نصائح وطرق توصل لها عن طريق الثقافه للوصول الى افضل ماعندك كرياضي
،
Y مثقف وشخصيه ملهمه يقيم محاضراته وندواته في انحاء العالم باخلاص وحب ويفيد الملايين بهذي المعرفه وينبه الناس دوما على صحتهم فهذا هو لولا الله ثم الصحه الجيده ماقدر يفيد ويوصل ويساعد هالكم من الناس
فهمتوها ؟؟
،
ولعل الجزء الاكبر منه هو في النقطه السابقه
لذا بتطرق هنا للامور الاخرى الي قد تغفل عنها رغم اهميتها
اولا وقبل كل شيء
احد يبني بيت بدون اساس ؟
احد يحط صينيه على الهواء وتراها بتثبت والامور تمام ؟
بالعقل كيف تدخل تخصص ماتعرف عنه شي او نظرتك قاصره فيه وكلها سمعت وقال فلان وذكر علان
وهالفلان والعلان ماعندهم الا الضعوي حرفيا
لمعرفة تخصصك الانسب -بإذن الله - :
1-اعرف التخصصات | اصنع الاساس المعرفي لكل تخصص حتى تتناوله بوضوح
-اسأل اهل التخصص والمعرفه الثابته اسأله موضوعيه
( تعطيك صوره واضحه ومعرفه كافيه تستند عليها عند ذكر هذا التخصص
كالاساس، بعيداً عن مشاعر الشخص الجيّاشه و اعتقاداته )
بمعنى ماتجي تقوله ذا صعب ؟
باللهي :) امانه عاد :) لا جد صادق انت ؟
الشخص يختلف عنك، في بيئته في طريقة تفكيره في ظروفه في قدراته
انا بسألك عشان تفهم قصدي بس
قل" راا را را رارا " , سهله ولا صعبه ؟
انت: سهله وش فيها
انا: يس سهله على الي مافيهم لتغه
طيب سؤال ثاني عد من واحد لعشره
12345678910
انت: ؟
انا: سهله عليك لكن الي عنده صعوبات او الطفل عسيره
اوك هذا اشياء واضحه جدا اجيب لك شي ادق
سألت شخص هذا التخصص صعب ؟
قال : " اووووه صعب وبس الا صعب ونص ياربيه احسني بموت خلاص انهد حيلي كرف وكروفنا وشغل وشغلونا وهم وشلنا هم ماخلونا نتنفس حشى الله ياخذهم حرام انا رايح ادرس ولا رايح هجج-بلقنبللبىتفقثقهتخهتصشتيبسنبتب "
* وينتهي بعد يومين *
تقولي :اوك وش فيها ؟
اقولك: مافيها شي بس انت راجع الشخص هذا من ؟
هل هو راعي حلطمه ويخلي من الحبه قبه وجحود ومايملى عينه شي
بالله هذا بيصدق في اجابته ؟
شخص ثاني
هذا عاد عارفينه صادق وخلوق وش زينه ماراح يكذب وقال انه صعب
انا اذكر ذا الشخص عنده مشكله في الرياضيات مايحبها اصلا وداخل تخصص فيه رياضيات،
وانت يالطيب من عشّاق الرياضات وهي لعبتك فالصعب عنده سهل عندك
اذاً اسأل السؤال الصحيح, وهو مثل :
المواد الي تدروسنها ايش ؟
اها عندكم رياضيات طيب وش الدروس الي تدروسونها فيه ؟
كم عددها وعدد ساعاتها ؟
الدكاتره كيف نظامهم ؟
الجامعه وش قوانينها ؟
الطلاب طبيعتهم ايش ؟
الطلاب وش عوائلهم وجنسياتهم ؟
وش مهيئين للطلاب ؟
2- تناسب التخصص معك * القسم الاول من الموضوع وسالفة صفات وقوتك وضعفك *
احيان فيك قوه وفيك رغبه لكن تخلص وانت منك ومنزعج جدا -هذا ان صمدت ماوقفت دراسه او حولت تخصص-
’’ ( لايكلف الله نفسها الا وسعها ) اذا الله بقدرته مايكلفك فوق طاقتك ليش تجي انت وتشيل ام الدنيا على ظهرك،
خاف الله يامسلم في نفسك واحترم قدراتك "رحم الله امرئ عرف قدر نفسه" ،،
3- قناعتك في التخصص
خل الماما والبابا وطلبات اختك وراي جدك وتحليل راعي البقاله لمستقبلك،
لك نفس
لك روح وقلب ينبض
وعقل يصارخ
اهدء ووقف اسمع لهم هم الي بيتجهدون معك ويروحون وين ماتروح وبيعاونونك بكل مافيهم
اذا هم احق انك تسمع لهم وتطيعهم من غيرهم
،
لو قلت لك شيل هالتلفزيون ودّه (خذه) هناك
هناك بعيد مش ئريب هناك مسافة سبعه كيلو لبيت رضوان
رحت انت تبي تركبها السياره جيت انا وقفتك
قلت: لا وش سيارته انت ووجهك
رح رجليه
انت : هاو (بمعنى مستغرب) ليش ؟
انا: شكلك مره كيوت وانت تمشي وشايل الاغراض
تخلص مني يجيك التعبان الثاني: لالا رح بالسيكل براد وسعة صدر
وانت تلفزيووون بمشي به سبعه كيلو وش سيكله انت ووجهك
يجي الوالد : لبد حصان وانا ابوك خلك فارس ولد فارس
وانت وجهك يتصفق وفي نفسك تقول وش فارسه انا بودي هالتبن وبرجع
ويلا رح بغير السياره شف كيف ترجع متحرول ولّا طاقتك الشمس على هالقايله
واحسن3 انت *** اليي سمعت كلامهم ورضوان بياخذ التلفزيون ولا درى عنك
،
من الاشياء الي تساعدك في اكتشاف هل هذي رغبتك او لا
(هذي في حال اذا انت خلاص تعودت سييده تروح كعابي لرضوان بالتفزيون ماتدري هو من طيب اصلك ولا سباكتن فيك )
- استرخِ، عاد انت ادرى بالي يدخّلك في حالة الاسترخاء والهدوء اما التامل في الطبيعه او التنفس بعمق او او او او ...
اذكر هالتخصص وشف وش المشاعر اذا كويسه فالحمدلله مامنه خوف اذا لا راجع نفسك فيه
- تخيل نفسك بهذا التخصص بعد عشر سنوات واكتب ايش راح تكسب وايش راح تخسر
ثم قيّم هل ترضى به ام لا ؟ اكتب هماه
- لاحظ في حياتك ايش الاشياء الي اذا سويتها تفرح ومستعد لو تظل تسويها طول اليوم بدون مقابل فقط لهذا الشعور الي يجيك منها مثلا لما تساعد شخص او تعلمه او لما تكتشف شي او لما تقرا كتاب او لما تسوي تصميم وهكذا
- وايضاً لاحظ في حياتك وش الايام او الاوقات الي يضيق صدرك فيها وايش سبب هالضيقه ؟ يمكن لانك ماسويت هذا الشي الي تحبه او تسوي شي معين يؤدي الى هذي المشاعر فانت راح تتجنب ان يكون تخصصك يحتوي على هذا الامر ولا بتكون غير مقتنع به وبتكرره وهذا الي نتجنبه طول التدوينه
- خلو الرغبه في التخصص من غايات اخرى
كالهياط به عند الناس , او الهروب من المشاكل تلقاه يبي طب بس فيه انجلش اجل مايحتاج ويفرك طول عمره يبيه , او عشان وظايفه كويسه ويخوض في الدنيا اهم شي يتخرج , او عشان كل اصدقائي فيه وش يطيرني عنهم
او السعي لاثبات الذات بطريقه خاطئه فتختار اصعب تخصص واندرها عشان يقولون فلان ماشاء الله ,
اختار الي يناسبك وابرز فيه وتثبت نفسك صح
هذي الي عندي والباقي هذي الفيديوهات بتوافيك به وتفيدك ان شاء الله
https://www.youtube.com/watch?v=5_NbrJbelbc
https://www.youtube.com/watch?v=lSmM8ufi99s
.
.
" وهذا كله اجتهادي , الخطا وارد والغايه هي الفائده "
استشيروا واستخيروا وتثبتوا ثم اعتمدوا المعلومة و اتخذوا القرار
لتكن الراحه نصيبكم ♥♥
ليست هناك تعليقات:
إرسال تعليق